Штогод напярэдадні Старога новага года работнікі Мастоўскага раённага цэнтра культуры адпраўляюцца ... калядаваць

З даўніх часоў на Беларусі распаўсюджанай забавай узімку былі калядныя вандраванні. Гэтай традыцыі нашых продкаў ужо не адно дзесяцігоддзе застаюцца вернымі работнікі раённага цэнтра культуры.

Калядная праграма, з якой калядоўшчыкі, па папярэдняй дамоўленасці, наведваюць дамы мастаўчан, насычана каляднымі песнямі, добрымі зычэннямі і вясёлымі забавамі.

Адной з галоўных дзеючых асоб каляднага гурта з’яўляецца Каза. Чаму менавіта яна? Нашы продкі верылі, што прысутнасць гэтай жывёлы ў двары адпуджвае розных нячысцікаў, прыносіць добры ўраджай, радасць і дабрабыт у хату.

– Хто з Казою патанцуе, таму ў гэтым годзе пашанцуе! – запрашаюць калядоўшчыкі да ўдзелу ў калядных забавах.

Разам з Казою ў карагод становяцца Дзед, Баба, Зорканоша, Дзед Мароз і Снягурачка. Часам да іх далучаецца і Цыганка, якая прапануе паваражыць аб будучым. А яно ў гаспадароў – шчаслівае і шчодрае на добрыя падзеі і шчырыя сустрэчы, прыемныя знаёмствы і цікавыя сюрпрызы.

Сустракаюць калядоўшчыкаў у Мастах гасцінна, з радасцю і пачастункамі за падараваны добры настрой, мудрыя зычэнні, магчымасць далучыцца да звычаяў нашых бабуль і дзядуль. Асабліва гасцям радуюцца дзеці, з ахвотай яны ўдзельнічаюць у прапанаваных гульнях.

Звычайна людзі загадзя рыхтуюцца да сустрэчы калядоўшчыкаў, шырока адкрываюць вароты, калі дом уласны, ці дзверы кватэры, а пасля шчодра дзякуюць за тое, што не прамінулі іх жылля, запрашаюць прыйсці і на наступны год.

Дарэчы, існуе даўняе павер’е, што адмовіцца прыняць у сваім доме калядоўшчыкаў – гэта тое ж самае, што наклікаць на сябе няміласць нячысцікаў, пазбавіцца дабрабыту на ўвесь наступны год. Таму і адчыняюцца шырока дзверы і душы мастаўчан у адказ на магічную фразу: “Калядоўшчыкаў сустракайце!”.

Час мяняецца, аднак сутнасць каляднага абрада, які беражліва захоўваюць работнікі культуры Мастоўшчыны, застаецца нязменным. Гэта шчырасць, добразычлівасць і паважлівыя адносіны да людзей – якасці, якімі заўсёды славіліся мастаўчане.

Н. ШЭЎЧЫК

Фота аўтара

Перепечатка материалов допускается с письменного разрешения «учреждение «Редакция газеты «Зара над Нёманам».