Пасадзі сваё дрэва!

“Талака, прысвечаная Году міру і стварэння” – пад такой назвай праходзіць у гэтым годзе Тыдзень лесу, галоўным дэвізам якога сталі словы “Пасадзі сваё дрэва!”

Стаць удзельнікам акцыі можа кожны. Дастаткова толькі праявіць ініцыятыву – звярнуцца  ў лясніцтва і заявіць аб сваім жаданні. У гэтым годзе кампанія адбудзецца ў нестандартным фармаце: кожная вобласць самастойна вызначыць тэрмін яе правядзення.

Кожны год педагогі і навучэнцы ДУА “Мілявіцкая  сярэдняя школа” ўдзельнічаюць у гэтай акцыі, таму вырашылі не парушаць традыцыю і ў гэтым годзе. Не дачакаўшыся пачатку акцыі (у Гродзенскай вобласці яна стартуе 15 красавіка), а кіруючыся прыроднымі ўмовамі, члены валанцёрскага атрада “Палымяныя сэрцы” ўстановы адукацыі звярнуліся да кіраўніцтва Курылавіцкага лясніцтва з прапановай  распачаць акцыю першымі! Андрэй Якусік,  ляснічы Курылавіцкага лясніцтва,  з задавальненнем адгукнуўся на прапанову правесці сумесную акцыю і прадаставіў нам такую магчымасць: выдзелілі тэрыторыю пад пасадку, забяспечылі саджанцамі елкі і сасны. 

Спачатку супрацоўнікі лясніцтва А.Э. Масюк і А.П. Рожка паказалі навучэнцам майстар-клас, а потым работа “закіпела”. Кожнаму хацелася ўнесці свой уклад у агульную справу і пасадзіць сваё дрэва, хацелася выканаць свой доўг перад самім сабой, перад прыродай.  Вельмі стараліся Данііл Боб, Ангеліна Тарлецкая, Вячаслаў Дубатоўка, Аляксандр Сцецко, Алеся Заміроўская, Паліна Новік, Анастасія Заяц. Садзілі дрэвы ў пэўным парадку: сем радкоў сасны, тры радкі елкі. Дзецьмі кіравала пачуццё адказнасці, узаемадапамогі, таварыскасці, дапытлівасці. Побач з намі працавалі навучэнцы і настаўнікі ДУА “Азёркаўская сярэдняя школа”. Таму ўвесь час прысутнічаў дух спаборніцтва і вясёлы настрой.

Пасадка лесу разнастаіла штодзённыя вучэбныя будні дзяцей, адкрыла іх з іншага боку. Удзельнікі акцыі пашырылі свае веды пра карысць хваёвых дрэў, пра іх ролю для кожнага чалавека асабіста і для нашай дзяржавы ў цэлым.

У прадаўжэнне добрых спраў многія намерыліся абавязкова пасадзіць дрэва яшчэ і каля свайго дома. 

Людміла КІСЛАЯ,  

дырэктар ДУА “Мілявіцкая  сярэдняя школа” 

Перепечатка материалов допускается с письменного разрешения «учреждение «Редакция газеты «Зара над Нёманам».