06 января 2012 — 10:00
На Новы год і Каляды прынята рабіць добрыя ўчынкі і падарункі для родных і блізкіх. Ніхто так не чакае ад свята цудаў, як дзеці, асабліва тыя, хто па волі лёсу сустракаў свята не дома сярод блізкіх людзей, а ў сацыяльным прытулку ці на бальнічным ложку. Каб ні адно дзіця не адчула сябе забытым і пакінутым, накіравана дабрачынная рэспубліканская акцыя “Нашы дзеці”.
Па добрай традыцыі ў святочныя дні кіраўнік дзяржавы А.Р. Лукашэнка наведваў з падарункамі і віншаваннямі сацыяльныя ўстановы, дзе знаходзяцца хлопчыкі і дзяўчынкі, пазбаўленыя бацькоўскага цяпла. Міласэрную эстафету падхапілі прадстаўнікі прадпрыемстваў, устаноў, дабрачынных фондаў, грамадскіх аб’яднанняў на месцах, каб павіншаваць дзяцей з навагоднімі і каляднымі святамі і ўручыць ім свае падарункі.
Навагодняя ёлка для адораных дзяцей з удзелам старшыні райвыканкама А.С. Шафарэвіча прайшла ў раённым цэнтры пазашкольнай работы. У дабрачыннай ёлцы для дзяцей-сірот і інвалідаў прыняла ўдзел намеснік старшыні райвыканкама Т.М. Мурына.
Работнікі ДП “Мастоўская МПМК-155” перадалі падарункі з цукеркамі і іншымі прысмакамі для дзяцей з сацыяльнага прытулку. Прадстаўнікі РУП ЖКГ наведалі з падарункамі дзяцей з цэнтра карэкцыйна-развіваючага навучання і рэабілітацыі. Кіраўнік фермерскай гаспадаркі “Гарызонт” Г.В. Мыслівец паклапаціўся ў гэтыя святочныя дні пра дзяцей-інвалідаў. Наведвальнікі дзённага аддзялення прабывання для інвалідаў ЦСАН выказваюць словы шчырай удзячнасці за дабрыню, міласэрнасць і падарункі Аладдзіну Бабышову.
Не засталіся ў баку ад дабрачыннай акцыі “Нашы дзеці” раённыя грамадскія арганізацыі “Белая Русь” і “Фонд міру”, Мастоўскі райкам прафсаюза работнікаў аграпрамысловага комплексу. Яны падрыхтавалі падарункі для дзяцей-сірот, якія засталіся без апекі бацькоў і выхоўваюцца ў прыёмных і апякунскіх сем’ях, дзіцячых дамах сямейнага тыпу і для тых рабят, якія ў святочныя дні знахо-дзіліся на лячэнні ў педыятрычным аддзяленні бальніцы.
Рабіць дабро дзецям ніколі не позна. Акцыя “Нашы дзеці” працягваецца. Любому з нас, не залежна ад займаемай пасады, можна ў гэтыя святочныя дні праявіць свае самыя лепшыя душэўныя якасці. Рука, працягнутая з дабром дзецям, ніколі не збяднее, а дабро да шчодрага чалавека вернецца ўдвая.
Я. ЦЕСЛЮКЕВІЧ
На здымках: удзельнікі навагодняга прадстаўлення для адораных дзяцей.
Фота С. ЗВЯРОВІЧА
Перепечатка материалов допускается с письменного разрешения «учреждение «Редакция газеты «Зара над Нёманам».
Назад