Заря над Неманом Идет подписка Что? Где? Когда? Районное радио
АктуальноОбществоСпорт и ТуризмТуризм и отдых

Турыстаў з Польшчы вабяць водныя маршруты на Аўгустоўскім канале

Турыстаў з Польшчы вабяць водныя маршруты на Аўгустоўскім канале03 августа 2017 — 10:30

 

Адзін з папулярных трэндаў гэтага сезона – сплавы на байдарках. З задавальненнем вывучаюць водныя маршруты Гродзеншчыны не толькі нашы суайчыннікі, але і замежныя турысты. Адно з самых прывабных падарожжаў – па Аўгустоўскім канале. Штодня беларуска-польскую мяжу праз пункт спрошчанага пропуска «Лясная – Рудаўка» на байдарках перасякаюць падарожнікі з розных краін Еўропы. У асноўным гэта госці з Польшчы. Яны не ўтойваюць: бязвізавы рэжым зрабіў беларускую частку Аўгустоўскага канала для іх яшчэ больш даступнай.


Пятніца для Збышка Шкопэка з Польшчы – асаблівы дзень. Хоць раз у месяц ён стараецца знайсці час, каб адправіцца разам з сябрамі ў шматдзённае падарожжа па Аўгустоўскім канале. Паводле яго слоў, месца настолькі палюбілася ім, жыхарам Шлёнскага ваяводства, што час да наступнага сплаву на байдарках яны лічаць літаральна па днях.



– Адлегласць да мяжы з Беларуссю перавышае 500 кіламетраў, але нас гэта не спыняе, – распавядае Збышак Шкопэк. – Сплавы звыкла плануем на пятніцу. На машынах дабіраемся да Аўгустова, там арандуем байдаркі і перасякаем пагранпераход «Лясная – Рудаўка» ужо па вадзе. Змены, унесеныя ў работу пункта пропуска ў гэтым годзе, зрабілі сплавы яшчэ больш камфортнымі. Раней аб сваім намеры трэба было папярэджваць загадзя і польскі, і беларускі бакі. Цяпер усё максімальна спрошчана. На «Лясной» уладкаваны спецыяльныя прычалы, на якіх і праводзіцца пагранічны кантроль. Пры адсутнасці праблем ён зойме некалькі хвілін: нават не трэба зыходзіць на бераг, каб аформіць дакументы.



Дарэчы, не займае шмат часу і шлюзаванне. Развітаўшыся з падарожнікамі ў прычала каля памежнага модуля, пераходжу да шлюза Кужынец. Узровень вады ў шлюзавых брам памяншаецца на вачах, яшчэ пяць хвілін, і шлюзы адкрываюцца, прапускаючы падарожнікаў далей па маршруце.



У гэты раз выпрабаваць свае сілы ў сплаве вырашылі чатырнаццаць гасцей з Польшчы. Звычайна іх маршрут праходзіць па Аўгустоўскім канале праз шлюзы Дамброўка і Нямнова, выходзіць да Нёмана і завяршаецца ў літоўскім Друскінінкаі.



– Прагулка запланаваная на тры дні. Як правіла, двойчы спыняемся на начлег. Адпачываем у палатках на беразе канала. Тым больш мінімум, неабходны для такіх падарожнікаў, як мы, ёсць: абсталяваныя прычалы, навесы. Усё вельмі зручна, – дадаюць падарожнікі.



ДАРЭЧЫ



Сезонны пагранпераход прыцягвае не толькі байдарачнікаў. Як распавялі ва ўпраўленні пагранічнага кантролю Гродзенскай пагрангрупы, часта мяжу тут перасякаюць таксама на катэрах, іншых маламерных судах. Не менш папулярныя веласіпедныя прагулкі. Толькі за апошні тыдзень мяжу ў пункце пропуска «Лясная – Рудаўка» перасяклі 64 замежныя турысты. Усе яны падарожнічаюць па Гродзеншчыне без віз. Усяго з пачатку сезона мяжу ў гэтым месцы перасяклі больш за 1,5 тысячы падарожнікаў, з іх звыш 900 замежнікі.



З пачатку дзеяння бязвізавага рэжыму на экскурсіях па Гродне і ваколіцах пабывала больш за 28 тысяч турыстаў з 55 краін.


Фото Віталя ДЗЯРНЕЙКА і з архіва БелТА
Кацярына ВЕСЯЛУХА



Назад

Написать комментарий


Ваше имя: Email: Ваш комментарий: