06 мая 2020 — 17:27
Помнікі і абеліскі… Стаяць яны ў ціхім маўчанні, нібы сама цішыня ахоўвае пакой тых, хто пад імі спіць. Ваенная бура вогненнай хваляй пракацілася па Мастоўшчыне, пакінуўшы пасля сябе дзясяткі спаленых вёсак, сотні забітых і знішчаных людзей. Не абмінула яна і тагачаснае мястэчка Пескі, дзе фашысты жывымі спалілі 60 яўрэяў. Як памяць ахвярам халакосту пастаўлены на невысокім пагорку помнік.
У 2018 годзе Пескі наведаў Леанід Смілавіцкі, доктар гістарычных навук, старэйшы навуковы супрацоўнік Цэнтра дыяспары пры Тэль-Авіўскім універсітэце. У газеце “Мост” ад 05.12.2018 года ён напісаў: “Памяць не можа быць нічыйнай – гэта ісціна. Сумленныя, разумеючыя значнасць яўрэйскай гісторыі людзі, прыйдуць сюды, каб навесці парадак”.
Ужо некалькі гадоў у дзяржаўнай установе адукацыі “Пескаўскі вучэбна-педагагічны комплекс дзіцячы сад-сярэдняя школа” рэалізуецца праект “Каб памяць жыла”. Члены валанцёрскага атрада “Добрае сэрца” ажыццяўляюць догляд за помнікам, займаюцца добраўпарадкаваннем. Гэтая вясна не стала выключэннем. У Год малой радзімы і 75-годдзя Вялікай Перамогі ля помніка прайшла патрыятычная акцыя “Пакуль мы помнім – мы жывём”, ініцыятарам якой стала Карына Копаць, член Маладзёжнага парламента Мастоўскага раёна, навучэнка 11 класа.У акцыі прынялі ўдзел дзве сям’і: шматдзетная сям’я Ю.В. Барашка і сям’я А.В. Копаць. Пад час акцыі сем’ямі было высаджана 75 саджанцаў сасны звычайнай, якія ўтварылі зялёную агароджу вакол помніка. Пад кіраўніцтвам леснікоў Пескаўскага лясніцтва А.М. Тарасевіча і А.В. Копаця ўсе працавалі з вялікім задавальненнем. Самаму малодшаму ўдзельніку Ягору Барашку не споўнілася яшчэ і трох гадоў, але яго рашучасць і ўпартасць, жаданне працаваць натхнялі нават дарослых.
Спонсарам гэтай акцыі стала Пескаўскае лясніцтва. Хочацца выказаць словы падзякі ляснічаму Юрыю Іосіфавічу Казлоўскаму за арганізацыю і дапамогу ў правядзенні акцыі.
Работа, пачатая членамі валанцёрскага атрада, членамі БРПА,бацькамі і настаўнікамі, знойдзе сваё прадаўжэнне. Восенню гэтага года каля помніка будзе пасаджана яшчэ 25 саджанцаў чырвонага дуба. “Памяць чалавека слабее з гадамі. Памяць народная наадварот – мацнее”, – пісаў К.Сіманаў. І колькі б дзесяцігоддзяў не прайшло, пасаджаныя дрэўцы будуць сімвалізаваць перамогу жыцця над смерцю.
Вялічка Рэгіна ,
педагог-арганізатар ДУА “Пескаўскі вучэбна-педагагічны комплекс дзіцячы сад-сярэдняя школа”
Перепечатка материалов допускается с письменного разрешения «учреждение «Редакция газеты «Зара над Нёманам».
Назад