Гудзевіцкі музей гасцінна прымаў наведвальнікаў у Міжнародны дзень музеяў

На працягу дня 18 мая Гудзевіцкі музей гасцінна прымаў наведвальнікаў. У Міжнародны дзень музеяў для ўсіх жадаючых была магчымасць бясплатна наведаць нашу ўстанову, а гасцей было шмат. Да нас прыйшлі амаль усе вучні Гудзевіцкай сярэдняй школы. Дзеці прынялі  актыўны ўдзел у інтэрактыўнай гульні “Сялянская хата на скарбы багата”, якая дэманструе талент і майстэрства нашых продкаў. Адчуць прывабнасць, мілагучнасць і сакавітасць нашай роднай беларускай мовы , а таксама паказаць свае веды можна было, прыняўшы ўдзел у гульні “Шануй родную мову”.

У рамках праекта “Гудзевічы – здаровы аграгарадок” была наладжана сустрэча з урачом мясцовай амбулаторыі Уладзімірам Валошчыкам, які пазнаёміў прысутных з шэрагам лекавых раслін, іх якасцямі і правіламі прыёму. Для замацавання гэтых ведаў мы прапанавалі комплекс заданняў у выглядзе віктарыны “Па здароўе да маці-Прыроды”.

І якія ж госці без пачастункаў! Духмяны чай, завараны на лекавых травах, атрымаў кожны ўдзельнік. І на гэтым  не спыніліся! Сумесна з работнікамі філіяла “Гудзевіцкі цэнтр вольнага часу і культуры”  пазнаёмілі прысутных з нацыянальнай культурай беларусаў праз традыцыйныя народныя песні  і танцы. Акрамя гэтага, усе жадаючыя мелі магчымасць зрабіць  здымак на памяць на фоне фотазоны #ГоднаеРоднае.

Лілія Рэйшэль,

ст.навуковы супрацоўнік УК “Гудзевіцкі дзяржаўны

літаратурна-краязнаўчы музей”

Перепечатка материалов допускается с письменного разрешения «учреждение «Редакция газеты «Зара над Нёманам».