27 апреля 2022 — 10:27
Фізічная культура і спорт з’яўляюцца неад’емнай часткай грамадства і кожнага чалавека паасобку. Яны прыносяць многа задавальнення і многа радасных момантаў. Ды і наогул, любы спорт фарміруе вынослівасць, мэтанакіраванасць.
Наша ўстанова адукацыі “Гудзевіцкая сярэдняя школа” ганарыцца сваімі спартыўнымі традыцыямі. Дні здароўя сталі сапраўднымі спартыўнымі святамі. Праводзяцца эстафеты, спартыўныя гульні. Вучні спаборнічаюць у бегу,скачках, падцягваюцца. Акрамя таго, кожны год праводзяцца спаборніцтвы па баскетболе, валейболе, “Вясёлыя старты” для малодшых школьнікаў. Усе гэтыя мерапрыемствы фарміруюць матывацыю здаровага ладу жыцця ў школьнікаў, выхаванне перакананасці і запатрабавання ў ім.
Нездарма на працягу многіх гадоў установа адукацыі займае прызавыя месцы ў спартыўных спаборніцтвах раённага, абласнога і рэспубліканскага ўзроўню. Нашы вучні заваявалі мноства ганаровых узнагарод. Радуе актыўнасць школьнікаў у жаданні ўвесь час змагацца за лідзіруючыя пазіцыі ў розных спартыўных спаборніцтвах.
Нядаўна прайшоў фінал рэспубліканскага спартыўна-масавага мерапрыемства “300 талентаў для Каралевы”. Удзельнікі прайшлі тры этапы адбораў і заваявалі пуцёўку ў фінал праекта сярод дзясяткаў тысяч школьнікаў. У ліку іх аказаўся і наш вучань IV класа Арсеній Ядэйка. Юныя спартсмены паказвалі свае ўменні ў чатырох дысцыплінах: кіданне мяча, скачок у даўжыню з месца, бар’ерны бег, эстафета 8×50. Каманда Гродзенскай вобласці выступіла паспяхова і заняла II месца.
Адкрываю дзверы і заходжу ў спартыўную залу, дзе трэніруюцца нашы вучні. Іх многа, і ўсе яны ў спартыўных касцюмах. Сярод іх заўважаю Арсенія Ядэйку. Хлопчык з дзяцінства любіць займацца спортам. Асабліва падабаецца яму лёгкая атлетыка. Арсеній расказвае: “Складана апісаць захапленне і хваляванне, якое адчуваеш, калі абыходзіш другіх спартсменаў. Сябры і родныя радуюцца за цябе, а настаўнік фізічнай культуры і здароўя А.Р.Занеўскі ганарыцца тваёй перамогай. Хочацца трэніравацца больш старанна, каб палепшыць свой вынік”.
З нецярпеннем будзем чакаць новых бліскучых перамог ад нашых юных спартсменаў!
Марына БАТВІНОЎСКАЯ, намеснік дырэктара
па вучэбнай рабоце ДУА “Гудзевіцкая сярэдняя школа”
Перепечатка материалов допускается с письменного разрешения «учреждение «Редакция газеты «Зара над Нёманам».
Назад